Сокинони шаҳри Ҳисор ҷашни Садаро ботантана таҷлил намуданд

ҲИСОР, 29.01.2026 /АМИТ «Ховар»/. 28 январ дар назди Амфитеатри Боғи фарҳангӣ-фароғатии шаҳри Ҳисор бо иштироки доираи васеи меҳмонону  сокинон ва кишоварзон чорабинии пуршукуҳи ҷашни Сада  баргузор гардид. Дар ин хусус ба хабарнигори минтақавии АМИТ «Ховар» Субҳониддини Маҳмуд котиби матбуоти Раиси шаҳри Ҳисор Ҳидоятулло Холзода  иттилоъ дод.

Бо ташаббуси кормандони Раёсати кишоварзӣ бахшида ба ҷашни Сада дар кӯчаи ба номи Тоҷиддин Муҳиддинов намоиши намунаи техника ва механизмҳои кишоварзӣ, ҳунарҳои мардумӣ, маснуоти оҳангарӣ ва намудҳои гуногуни хӯрокҳои  миллӣ, аз ҷумла маҳсулоти нонӣ доир  карда шуд.

Зимни ҳамоиш Раиси шаҳри Ҳисор Ҷаббор Носирзода дар бораи ҷашни Сада, таърихи пайдоиш, моҳият, ҳадафҳо ва нақши бузурги он дар рӯзгори ҳазорсолаи мардуми тоҷик сухан гуфт. Иброз гардид, ки Сада бо таърихи қадимӣ бузургтарин ҷашни миллии тоҷикон ва аҷдодонамон маҳсуб шуда, ниёгони мо онро аз замонҳои хеле қадим таҷлил менамуданд. Бо шарофати соҳибистиқлолӣ ва сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон анъанаю суннатҳо ва ҷашнҳои миллии мардуми куҳанбунёди мо аз нав эҳё гардида, арҷгузорӣ ба онҳо сол ба сол бештар шуд. Имрӯз Сада ба муҳимтарин ҷашни миллӣ табдил ёфтаю  ифодагари марому ормонҳои беҳтарини халқи мо маҳсуб мешавад.

Таҷлили ҷашнҳои бошукуҳи умумимиллӣ нишонаи ваҳдат, иттиҳоду сарҷамъӣ ва ҷонибдории мардуми диёр аз сиёсати пешгирифтаи Ҳукумати Ҷумҳурии Тоҷикистон буда, ҳамзамон чун рамзи меҳру муҳаббат, дӯстию рафоқат, арҷгузорӣ ва иззату эҳтиром ба эҳёи ҷашну маросими миллии бостонӣ маънидод мегардад.

Дар ҷамъомади тантанавӣ як зумра фаъолони соҳаи кишоварзӣ ва собиқадорони соҳа, ки дар рушди соҳаи кишоварзии шаҳр ва таъмини амнияти озуқавории мамлакат саҳми арзишманд гузоштаанд, бо Сипосномаи Мақомоти иҷроияи ҳокимияти давлатии шаҳри Ҳисор сарфароз гардонида шуданд.

АКС: Мақомоти иҷроияи ҳокимияти давлатии шаҳри Ҳисор