Асарҳои рассомони тоҷик дар Намоишгоҳи байналмилалии «Санъат бе марз – 2026» дар Ҷопон баҳои баланд гирифтанд

Февраль 2, 2026 13:40

ДУШАНБЕ, 02.02.2026 /АМИТ «Ховар»/. Аз 22 январ то 1 феврали соли 2026 дар Маркази миллии санъати шаҳри Токиои Ҷопон бо иштироки рассомон ва мактаббачагони кишварҳои гуногуни ҷаҳон Намоишгоҳи байналмилалии «Санъат бе марз-2026» баргузор гардид. Дар ин хусус ба АМИТ «Ховар» аз Сафорати Ҷумҳурии Тоҷикистон дар Ҷопон хабар доданд.

Бо мусоидати Сафорати Ҷумҳурии Тоҷикистон дар Ҷопон эҷодиёти мактаббачагони Тоҷикистон дар доираи Намоишгоҳи байналмилалии «Санъат бе марз – 2026» муаррифӣ гардида, кори онҳо ба намоиш гузошта шуд. Мактаббачагони тоҷик дар мавзуъҳои Ватан, фарҳанг, табиат ва манзараҳои зебои Тоҷикистон, анъана ва ҷашнҳои миллӣ, аз ҷумла Наврӯз ва Тиргон асарҳо офариданд.

Иброз гардид, ки корҳои пешниҳоднамудаи мактаббачагони Тоҷикистон аз ҷониби ташкилкунандагони намоишгоҳ ва Президенти Ассотсиатсияи байналмилалии SUMI Тоҳун Кобаяшӣ баҳои баланд гирифта, иштирокчиён бо ифтихорномаҳо сарфароз гардонида шуданд.

Президенти Ассотсиатсияи байналмилалии SUMI Тоҳун Кобаяшӣ аз иштироки фаъолонаи мактаббачагони Тоҷикистон изҳори қаноатмандӣ намуда, барои мусоидат дар баргузории Намоишгоҳи байналмилалии «Санъат бе марз – 2026» ба ҷониби Тоҷикистон изҳори сипос намуд.

Ҳамчунин бо ташаббуси Сафорати Ҷумҳурии Тоҷикистон дар Ҷопон дар ҳошияи баргузории намоишгоҳ дар Маркази миллии санъати шаҳри Токиои Ҷопон гӯшаи Тоҷикистон ташкил гардид. Дар он таърих ва тамаддун, фарҳанг, кандакорӣ, китобҳо, либос ва асбоби мусиқии миллии тоҷикӣ, инчунин имконияти сайёҳӣ ва фароғатии мамлакат ба иштирокчиён ва меҳмонон муаррифӣ карда шуд.

Президенти Ассотсиатсияи байналмилалии SUMI Тоҳун Кобаяшӣ зимни мусоҳиба изҳор дошт, ки баргузоркунандагони Намоишгоҳи байналмилалии «Санъат бе марз – 2026» асарҳои рассомонро аз саросари ҷаҳон бо ифтихор ҷамъ оварда, саҳми рассомони Тоҷикистонро махсусан арзишманд арзёбӣ мекунанд.

Ба андешаи ӯ, таърихи мубодилаи фарҳангӣ байни Ҷопон ва Тоҷикистон, ки реша дар Роҳи Абрешим дорад, имрӯз низ аҳамияти худро нигоҳ доштааст. Ин робитаи таърихиро ҳатто дар нақш ва услуби баъзе асарҳои пешниҳодшуда эҳсос кардан мумкин аст, ки аз ҷиҳати бадеӣ ба намунаҳои ганҷинаҳои ёфтшудаи Шосоин шабоҳат дошта, эҳсоси наздикӣ ва пайванди фарҳангӣ ба вуҷуд меоранд.

Тоҳун Кобаяшӣ ҳамчунин аз асарҳои рассомии кӯдакони тоҷик изҳори қаноатмандӣ намуда, таъкид кард, ки онҳо муҳаббати амиқ ба табиат ва Ватанро инъикос мекунанд. Манзараҳои нотакрори табиии Тоҷикистон дар корҳои кӯдакон бо нозукбинӣ ва эҳсоси гарму самимӣ тасвир ёфтаанд.

Иброз гардид, ки бо пешрафти техника ва рушди интернет мардумони кишварҳои гуногун ба ҳам наздиктар мегарданд. Ин раванд имконият фароҳам овард, ки мактаббачагони зиёд аз минтақаҳои мухталифи Тоҷикистон асарҳояшонро ба намоишгоҳ ирсол намоянд. Президенти Ассотсиатсияи SUMI иштироки фаъоли наврасони боистеъдоди тоҷикро дар чорабинии мазкур нишонаи рушди санъати тасвирӣ ва эҷодиёти кӯдакон дар мамлакат арзёбӣ намуд.