Дар Душанбе тақвияти ҳамкории гумрукӣ байни Тоҷикистон ва Узбекистон баррасӣ гардид

ДУШАНБЕ, 18.02.2026 /АМИТ «Ховар»/. Дар шаҳри Душанбе масъалаҳои муҳими ҳамкории дуҷонибаи гумрукӣ байни Тоҷикистон ва Узбекистон дар мулоқоти Сардори Хадамоти гумруки назди Ҳукумати Ҷумҳурии Тоҷикистон  Хуршед Каримзода бо муовини Раиси Кумитаи гумруки назди Вазорати иқтисод ва молияи Ҷумҳурии Узбекистон Надир  Мусамухамедов баррасӣ гардиданд, иттилоъ медиҳад АМИТ «Ховар» бо истинод ба Хадамоти гумруки назди Ҳукумати Ҷумҳурии Тоҷикистон.

Ҷонибҳо масъалаҳои муайян намудани арзиши гумрукӣ, татбиқи меъёрҳои боҷи воридотӣ, истифодаи усули захиравии арзёбӣ, инчунин рушди рақамикунонӣ ва табодули электронии маълумотро  мавриди баррасӣ қарор доданд.

Сардори Хадамоти гумрук сатҳи баланди муносибатҳои байнидавлатӣ байни Ҷумҳурии Тоҷикистон ва Ҷумҳурии Узбекистонро таъкид намуда, онҳоро бародарона ва стратегӣ арзёбӣ намуд. Гуфта шуд, ки усулҳои амалкунандаи арзёбии гумрукӣ нисбат ба ҳамаи молҳо, новобаста аз кишвари истеҳсол татбиқ гардида, бар зидди ягон тараф равона нашудаанд.

Таваҷҷуҳи махсус ба масъалаҳои ҷорӣ намудани механизмҳои иттилооти пешакӣ ва ҳамкории электронӣ оид ба молҳои транзитӣ, инчунин молҳо ва воситаҳои нақлиёте, ки аз ҷониби шахсони воқеӣ барои мақсадҳои ғайритиҷоратӣ интиқол меёбанд, зоҳир гардид. Татбиқи ин тадбирҳо ба содагардонии расмиёти гумрукӣ, коҳиш додани вақти барасмиятдарорӣ ва баланд бардоштани шаффофияти равандҳо мусоидат мекунад.

Дар натиҷаи вохӯрӣ ҷонибҳо ба мувофиқа расиданд, ки гурӯҳи кории муштарак таъсис дода шуда, ҳамкории электронӣ, табодули маълумот ва ҳамоҳангсозии фаврӣ байни сохторҳои масъул тақвият дода шавад.

Дар анҷоми вохӯрӣ ҷонибҳо изҳори боварӣ намуданд, ки мувофиқаҳои бадастомада ба таҳкими муколамаи созанда, боло бурдани сатҳи эътимоди мутақобил ва баланд бардоштани самаранокии ҳамкории гумрукӣ ба манфиати ҳарду давлат мусоидат хоҳанд кард.

 АКС: Хадамоти гумруки назди Ҳукумати Ҷумҳурии Тоҷикистон