Дар Хатлон ҷаласаи якуми Ситоди вилоятии мубориза бар зидди малах баргузор шуд

ДУШАНБЕ, 09.02.2026. /АМИТ «Ховар»/. Масъулини филиалҳои Корхонаи воҳиди давлатии «Экспедитсияи мубориза бар зидди малах» дар минтақаҳои Бохтар ва Кӯлоб вазифадор гардиданд, ки дар муҳлатҳои кӯтоҳтарин харитаи мавзеъҳои эҳтимолии паҳншавии малахро таҳия намуда, коркарди техникиро дар ин минтақаҳо ба роҳ монанд. Корҳои кимиёвӣ бар зидди малахи марокашӣ аз моҳи март оғоз гардида, дар се марҳила гузаронида мешаванд. Дар ин хусус имрӯз дар Мақомоти иҷроияи ҳокимияти давлатии вилояти Хатлон зимни ҷаласаи якуми Ситоди вилоятии мубориза бар зидди малах иттилоъ дода шуд.

Тавре АМИТ «Ховар» бо истинод ба Хадамоти матбуоти Раиси вилояти Хатлон хабар медиҳад, дар ҷаласа инчунин масъулин ҷиҳати таъмиру омодасозии техникаю мошинолот, таъмини сӯзишворӣ ва захираи кофии заҳрхимикатҳои сахттаъсир вазифадор гардиданд.

Таъкид гардид, ки бо назардошти мушоҳида шудани паҳншавии малахи марокашӣ дар баъзе ноҳияҳои кӯҳистон, аз имрӯз сар карда бояд тамоми чораҳои зарурӣ барои пешгирӣ ва нест намудани ин ҳашароти зараррасон андешида шаванд. Зеро малах метавонад ба майдонҳои кишти зироати кишоварзӣ, чарогоҳҳо ва ҷангалзор зарари ҷиддӣ расонад.

Раиси вилояти Хатлон Давлаталӣ Саид масъулинро вазифадор намуданд, ки омодагиро ба мавсими мубориза бар зидди малах пурзӯр намуда, иҷрои саривақтии чорабиниҳоро таъмин намоянд. Ҳамзамон супориш дода шуд, ки дар шаҳру ноҳияҳо ва ҷамоатҳои деҳоти осебпазир ситодҳои шаҳрию ноҳиявӣ фаъолияти худро ҷиддӣ ба роҳ монанд ва ҳамоҳангсозии корҳоро таъмин кунанд.

Ба иттилои мутахассисон, ин навъи малах бештар дар минтақаҳои дастнорас тухм гузошта, баъдан аз доманакӯҳҳо ба водиҳо ва заминҳои кишоварзӣ ҳаракат мекунад, ки сари вақт андешидани тадбирҳоро тақозо менамояд.

Бо мақсади пешгирӣ аз хуруҷи оммавии малахи марокашӣ дар вилояти Хатлон ҳамасола Ситоди мубориза таъсис дода шуда, барои таъмини саривақтии корҳо заҳрхимикатҳо, сӯзишворӣ ва дигар воситаҳои зарурӣ дастрас карда мешаванд.

АКС: Хадамоти матбуоти Раиси вилояти Хатлон