Дар Тотористон бо соҳибкорони Тоҷикистон вохӯрӣ доир гардид

ДУШАНБЕ, 25.02.2026 /АМИТ «Ховар»/. 23 феврал дар шаҳри Қазони Ҷумҳурии Тотористони Федератсияи Русия Раиси вилояти Хатлон Давлаталӣ Саид бо роҳбарону намояндагони диаспораи тоҷик, соҳибкорон ва ҳамватаноне, ки дар ин мамлакат кору зиндагӣ менамоянд, вохӯрӣ намуд. Дар ин хусус ба АМИТ «Ховар» аз хадамоти матбуоти Раиси вилояти Хатлон иттилоъ доданд.

Дар мулоқот иброз гардид, ки муносибатҳои дуҷонибаи Тоҷикистону Русия рушд ёфта, мулоқотҳои мунтазами сарони ду давлат барои таҳкими ҳамкории гуногунҷанба заминаи мусоид фароҳам овардаанд. Дар даврони соҳибистиқлолӣ созишномаҳои зиёди байнидавлатӣ, байниҳукуматӣ ва байниидоравӣ ба имзо расида, Тоҷикистону Русия ҳамчун шарикони стратегӣ ҳамкориро густариш медиҳанд.

Иттилоъ дода шуд, ки бахшида ба 35-солагии Истиқлоли давлатӣ дар шаҳру ноҳияҳои вилояти Хатлон 6260 иншоот бунёд гардидааст. Ҳамзамон фазои сармоягузорӣ дар мамлакат тадриҷан беҳтар гардида, заминаҳои ҳуқуқии ҳимоя ва дастгирии соҳибкорону сармоягузорон мутобиқ ба стандартҳои байналмилалӣ такмил ёфтаанд. Хизматрасониҳои электронии муосир амалӣ гардида, барои фаъолияти озоду бехатари сармоягузорони ватанию хориҷӣ шароити мусоид фароҳам оварда шудааст.

Дар вохӯрӣ ба масъалаи гаравидани бархе ҷавонон ба ҳизбу ҳаракатҳои ифротӣ дар шароити муҳоҷират таваҷҷуҳи махсус зоҳир гардид. Таъкид шуд, ки пешгирии чунин зуҳуроти номатлуб вазифаи муштараки давлат, ҷомеа ва ҳар оила буда, баланд бардоштани маърифати сиёсиву ҳуқуқӣ, ҳисси ватандӯстӣ ва худшиносии миллӣ дар байни ҷавонон аҳамияти калидӣ дорад.

АКС: Хадамоти матбуоти Раиси вилояти Хатлон