Индонезия бақайдгирии кӯдакони то 16-соларо дар шабакаҳои иҷтимоӣ манъ мекунад

ДУШАНБЕ, 09.03.2026 /АМИТ «Ховар»/. Индонезия аз 28 март бақайдгирии кӯдакони то 16-соларо дар шабакаҳои иҷтимоӣ манъ менамояд,  изҳор доштааст вазири алоқа ва технологияҳои рақамии Индонезия Меутя Ҳафид. Дар ин хусус АМИТ «Ховар» бо истинод ба БЕЛТА хабар медиҳад.

«Ҳукумат қарор қабул намуд, ки аз 28 март дастрасии кӯдакони то 16-сола ба платформаҳои рақамии дорои хавфи баланд, аз ҷумла шабакаҳои иҷтимоӣ ва хизматрасониҳои мубодилаи паёмҳо манъ карда шавад», — изҳор дошт вазир.

Ба иттилои Меутя Ҳафид, дар марҳилаи аввал ҳисоби корбарии кӯдакони то 16-сола дар чунин платформаҳо, ба мисли YouTube, TikTok, X, Bigo Live, Roblox, Instagram, Threads ва дигар шабакаҳо тадриҷан ғайрифаъол карда мешавад.

Тавре вазир таъкид намуд, чунин иқдом посух ба вазъияте мебошад, ки онро «ҳолати фавқулодаи рақамӣ» арзёбӣ мекунанд.

Пештар мақомоти якчанд кишвар, аз ҷумла Фаронса, Словения, Британияи Кабир, Финландия, Португалия ва дигар давлатҳо низ ҷонибдориашонро барои маҳдуд ё пурра манъ намудани истифодаи шабакаҳои иҷтимоӣ аз ҷониби ноболиғон изҳор карда буданд.

Австралия аввалин кишвари ҷаҳон буд, ки истифодаи шабакаҳои иҷтимоиро барои кӯдакони то 16-сола манъ намуд.

АКС аз бойгонӣ