«ЗАН-МОДАР — ПАЙВАНДГАРИ НАСЛҲО». Дар Душанбе ҳамоиши маърифатӣ — фарҳангӣ доир гардид

ДУШАНБЕ, 02.03.2026 /АМИТ «Ховар»/. Бо ташаббуси Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе таҳти унвони «Зан-Модар — пайвандгари наслҳо» бо иштироки занону духтарони фаъоли пойтахт ҳамоиши маърифатӣ-фарҳангӣ доир гардид. Дар ин хусус АМИТ «Ховар» бо истинод ба Раёсати кор бо занон ва оилаи шаҳри Душанбе хабар медиҳад.

Иброз гардид, ки модар чароғи нурбахшу сафобахши ҳар хонадон, ганҷи бебаҳо ва фариштаи илоҳӣ барои фарзанд аст. Ҳамзамон рисолати модар дар пос доштани фарҳангу адабиёт, забону ҳувияти миллӣ ифода меёбад, яъне тарбияи фарзанд низ бар дӯши модар аст. Ободии ҳар хонадон ба хиради созандаву неруи тавонои офарандагии зан – модар бастагӣ дорад. Аз ин ҷост, ки ҳар хонаводаи ободу осуда тимсоли ободию субот дар ҳар давлату ҷомеа дониста мешавад.

Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе дар доираи сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон масъалаи таъмини ҳуқуқу манфиатҳои занону модаронро ҳамеша дар маркази диққат қарор медиҳад. Раёсат барои беҳтар гардонидани вазъи иҷтимоии занону модарон, ҳифзи ҳуқуқи оила ва модару кӯдак, фароҳам овардани шароити мусоиди зиндагию кор барои занону  модарон ва муҳимтар аз ҳама, ҳарчи бештар ба раванди идораи давлат ҷалб намудани онҳо ва баланд бардоштани нақши иҷтимоии занону духтарон ҳама тадбирҳои заруриро амалӣ менамояд.

Ҳамзамон гуфта шуд, ки модарону хоҳарон ҳамчун сокинони пойтахт иқдоми созандаи шаҳрдориро ҳамеша дастгирию ҷонибдорӣ карда, дар амалӣ сохтани корҳои ободонию созандагӣ дар шаҳр саҳми назаррас мегузоранд.

АКС: Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе