Ҳамкорӣ байни Академияи миллии илмҳои Тоҷикистон ва Донишгоҳи Оксфорд баррасӣ гардид

ДУШАНБЕ, 09.04.2026. /АМИТ «Ховар»/. Густариши ҳамкории илмӣ-таҳқиқотии Академияи миллии илмҳои Тоҷикистон ва Донишгоҳи Оксфорд 8 апрел  зимни мулоқоти президенти академия Қобилҷон Хушвахтзода ва намояндагони донишгоҳ ва мутахассисони соҳаи забон ва адабиёти форсӣ баррасӣ гардид.

Тавре ба АМИТ «Ховар» аз Академияи миллии илмҳо хабар доданд, ҷонибҳо масъалаи бастани созишнома байни академия ва донишгоҳ, табодули таҷриба байни олимон, ба роҳ мондани барномаҳои муштараки таълимӣ ва иҷрои лоиҳаҳои байналмилалиро мавриди баррасӣ қарор доданд. Иброз гардид, ки ҳамкорӣ дар самти омӯзиши забон ва адабиёти форсӣ, таҳқиқи мероси фарҳангӣ ва рушди равобити академӣ метавонанд ба манфиати ҳарду ҷониб хизмат намоянд.

Инчунин ба масъалаи тайёр намудани кадрҳои илмӣ аз ҳисоби магистрантон ва докторантон таваҷҷуҳи хос зоҳир гардида, ҷонибҳо зарурати таҳкими ҳамкориро дар самти омода намудани мутахассисони баландихтисос таъкид намуданд. Гуфта шуд, ки ҷалби ҷавонони болаёқат ба барномаҳои магистратура ва докторантура, ташкили табодули донишҷӯён ва муҳаққиқон, инчунин фароҳам овардани шароити мусоид барои анҷом додани таҳқиқоти муштарак метавонад ба рушди минбаъдаи илму маориф ва тақвияти иқтидори зеҳнии ҷомеа мусоидат намояд.

Ҳамсуҳбатон оид ба баргузор намудани конфронсҳо ва машваратҳои муштараки илмӣ дар оянда ба мувофиқа расиданд. Таъкид шуд, ки чунин чорабиниҳо метавонанд барои табодули дониш, муаррифии натиҷаҳои таҳқиқот ва густариши ҳамкории илмӣ заминаи мусоид фароҳам оваранд.

АКС: Академияи миллии илмҳои Тоҷикистон