ДАРАХТИ ДӮСТӢ БИНШОН. Ректорони донишгоҳҳои «сабз» беш аз 50 бех ниҳоли дарахти ҳамешасабз шинониданд

ДУШАНБЕ, 15.04.2026. /АМИТ «Ховар»/. Иштирокдорони ҳамоиши ректорони донишгоҳҳои «сабз», ки имрӯз дар пойтахти Тоҷикистон- шаҳри Душанбе дар доираи Форуми байналмилалии «Ҳамкорӣ ба хотири рушди устувор: Сабз. Рақамӣ. Ҳушманд» баргузор гардид, дар саҳни Донишгоҳи байналмилалии сайёҳӣ ва соҳибкории Тоҷикистон беш аз 50 бех ниҳоли дарахтони ҳамешасабз шинониданд, иттилоъ медиҳад хабарнигори АМИТ «Ховар».

Ин иқдом бо мақсади тақвияти дӯстию рафоқат, ҳамкории судманди ояндадор ва татбиқи яке аз ҳадафҳои рушди устувор- таъмини устувории муҳити зист, хусусан сарсабзу хуррам нигоҳ доштани сайёраи Замин амалӣ карда шуд.

Ин иқдом ба он рабт дорад, ки аз ҷониби Ҳукумати Ҷумҳурии Тоҷикистон бо ташаббуси Президенти Ҷумҳурии Тоҷикистон муҳтарам Эмомалӣ Раҳмон барои ба «кишвари сабз» табдил додани Тоҷикистон «Барномаи давлатии кабудизоркунии Ҷумҳурии Тоҷикистон барои давраи то соли 2040» қабул гардидааст. Тибқи нақшаи амал дар қаламрави мамлакат то соли 2040 бояд зиёда аз 2 миллиард бех ниҳол шинонида шавад. Ниҳолҳо на танҳо дар ҳудуди ҷангалзор, балки дар шаҳрҳо, канори роҳҳо, атрофи заминҳои кишоварзӣ ва минтақаҳои кӯҳӣ низ шинонида мешаванд. Ба дарахтони мевадиҳанда, сояафкан ва ороишӣ, ки ба иқлими хушки минтақа тобовар мебошанд, афзалият дода мешавад.

Мақсади асосии таҳия ва қабули «Барномаи давлатии кабудизоркунии Ҷумҳурии Тоҷикистон барои давраи то соли 2040» мубориза бо чангу ғубор, муътадилсозии иқлим, беҳтар сохтани вазъи муҳити зист, коҳиши обшавии пиряхҳо ва ба «кишвраи сабз» табдил додани Тоҷикистон мебошад.

Марзия САИДЗОДА,
АМИТ «Ховар»

АКС: АМИТ «Ховар»