СОЛИ ВУСЪАТ ДОДАНИ КОРҲОИ ОБОДОНИВУ СОЗАНДАГӢ. Дар Истаравшан бунёди иншооти соҳаи маориф идома дорад

ДУШАНБЕ, 14.04.2026. /АМИТ «Ховар»/. Дар Ҷамоати деҳоти Қалъачаи калони шаҳри Истаравшан сохтмони Муассисаи таҳсилоти миёнаи умумии №52 бо саҳми сокинон ва соҳибкорони ҳимматбаланд ҷараён дорад, ки он барои 1440 хонанда дар ду баст пешбинӣ шудааст. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Истаравшан иттилоъ медиҳад.

Муассисаи таълимӣ аз 24 синфхона иборат буда, ҳамчунин дорои китобхона, ошхона ва толори маҷлисгоҳ хоҳад буд.

Бо зиёд шудани аҳолӣ талабот ба муассисаҳои таҳсилоти томактабӣ ва миёнаи умумӣ меафзояд. Дар доираи сиёсати маорифпарваронаи Президенти Ҷумҳурии Тоҷикистон муҳтарам Эмомалӣ Раҳмон бунёди иншооти соҳаи маориф дар шаҳру ноҳияҳои мамлакат, инчунин дар вилояти Суғд идома дорад.

Дар айни замон дар шаҳри Истаравшан 79 муассисаи таълимӣ фаъолият дошта, дар онҳо зиёда аз 62 ҳазору 700 хонанда ба таҳсил фаро гирифта шудаанд. Дар ин муассисаҳо 3326 омӯзгор бо ҷойи кори доимӣ таъмин буда, шумораи муассисаҳои томактабӣ ба 21 адад расидааст.

Дар назди ин муассиса бунёди майдони Парчами давлатии Ҷумҳурии Тоҷикистон бо сутунпояи 35 метр ва майдони варзишӣ низ ба нақша гирифта шудааст.

АКС: Мақомоти иҷроияи ҳокимияти давлатии шаҳри Истаравшан