«БИСТСОЛАИ ОМӮЗИШ ВА РУШДИ ФАНҲОИ ТАБИАТШИНОСӢ, ДАҚИҚ ВА РИЁЗӢ ДАР СОҲАИ ИЛМУ МАОРИФ». Доир ба он дар гимназия ва литсейҳо дарсҳои кушод гузаронида шуданд

ДУШАНБЕ, 03.05.2026 /АМИТ «Ховар»/. Дар доираи татбиқи «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» (2020–2040) ва «Барномаи давлатии тайёр кардани кадрҳои сатҳи баланди илмӣ барои солҳои 2021–2030» барои хонандагони синфҳои болоии муассисаҳои таҳсилоти миёнаи умумии шаҳри Душанбе аз ҷониби кормандони Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон дарсҳои кушод гузаронида шуданд.

Аз Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон ба АМИТ «Ховар» иттилоъ доданд, ки ҳадафи ин чорабинӣ  ҷалби  ҷавонон ба фанҳои дақиқ мебошад. Зеро ояндаи иқтисодиёти мамлакат дар бисёр ҷанбаҳо аз ҷавонони лаёқатманд, олимони баландихтисос ва муҳандисони таҷрибадор вобастагии калон дорад. Аз ин рӯ, рушди илмҳои дақиқ ва тайёр намудани кадрҳои баландихтисос аз солҳои мактабӣ оғоз ёбад.

Дар ҷараёни вохӯриҳо ба хонандагон дар бораи самтҳои асосии фаъолият ва пешбурди корҳои илмӣ-таҳқиқотӣ дар озмоишгоҳи Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон маълумоти муфассал расонида шуд.

Чунин дарси кушод дар Гимназияи №1 шаҳри Бӯстони вилояти Суғд низ гузаронида шуд. Дар он 60 нафар хонандагони синфҳои болоӣ ва омӯзгорон иштирок намуданд.

Зимни чорабиниҳо байни мутахассисони соҳавӣ ва мактаббачагон саволу ҷавобҳо гузаронида шуданд. Дарсҳои кушод хеле самаранок баргузор гардида, дар байни хонандагон таваҷҷуҳи зиёд ва ҳавасмандӣ ба фанҳои дақиқ зоҳир гардид.

АКС: Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон