Дар «Саноатсодиротбонк» Рӯзи дарҳои кушод баргузор гардид

ДУШАНБЕ, 26.05.2026 /АМИТ «Ховар»/. Дар Корхонаи воҳиди давлатии Бонки саноативу содиротии Тоҷикистон (КВД БССТ) «Саноатсодиротбонк» бо иштироки донишҷӯён ва хатмкунандагони равияҳои иқтисодии муассисаҳои таҳсилоти олии кишвар Рӯзи дарҳои кушод баргузор гардид.

Тавре ба АМИТ «Ховар» аз «Саноатсодиротбонк»  хабар доданд, дар доираи чорабинӣ иштирокчиён бо фаъолияти бонк, хизматрасонии муосири молиявӣ, имконияти таҷрибаомӯзӣ ва рушди касбӣ аз наздик шинос шуданд.

Ҳамчунин аз ҷониби мутахассисони бонк дарсҳои омӯзишӣ ва машғулиятҳои интерактивӣ баргузор гардида, ба ҷавонон вобаста ба фаъолияти низоми бонкӣ, технологияҳои рақамии молиявӣ ва имкониятҳои кору рушд маълумоти муфид пешниҳод карда шуд.

Иброз гардид, ки баргузории чунин чорабиниҳо барои омода намудани кадрҳои ҷавону рақобатпазир, баланд бардоштани саводнокии молиявӣ ва ҷалби ҷавонони соҳибмаълумот ба соҳаи бонкдорӣ мусоидат менамояд.

Ҳамзамон донишҷӯён имкон пайдо намуданд, ки бо кормандони соҳа суҳбати озод анҷом дода, доир ба таҷрибаи корӣ, талаботи бозори меҳнат ва роҳҳои рушди касбӣ маълумоти зарурӣ дастрас намоянд.

АКС: «Саноатсодиротбонк»