Муовини якуми Раиси шаҳри Душанбе бо ҳайати шаҳри Санкт-Петербурги Федератсияи Русия вохӯрӣ намуд

ДУШАНБЕ, 20.05.2026 /АМИТ «Ховар»/. Имрӯз муовини якуми Раиси шаҳри Душанбе Бахтиёр Шарифӣ бо ҳайати шаҳри Санкт-Петербурги Федератсияи Русияро, ки барои иштирок дар Рӯзҳои Санкт-Петербург дар шаҳри Душанбе ба пойтахти мамлакат омадаанд, мулоқот намуд. Дар ин хусус ба АМИТ «Ховар» аз Мақомоти  иҷроияи ҳокимияти давлатии шаҳри Душанбе хабар доданд.

Дар вохӯрӣ ҷонибҳо аз муколамаи фаъол ва мунтазами сатҳи олӣ давоми 35-соли робитаҳои бародаршаҳрӣ изҳори қаноатмандӣ карда, густариши боз ҳам бештари муносибатҳои ҳамаҷонибаи байнишаҳриро дар арсаҳои гуногуни мавриди таваҷҷуҳ ба манфиати мардумони ду шаҳр арзёбӣ намуданд.

Тавре қаблан иттилоъ додем, 20–23 май дар пойтахти мамлакат Рӯзҳои Санкт–Петербург баргузор мегарданд, ки ба 35–солагии истиқрори робитаҳои бародаршаҳрӣ байни шаҳрҳои Душанбе ва Санкт–Петербург бахшида мешаванд.

Дар доираи Рӯзҳои шаҳри Санкт–Петербург баргузории вохӯриҳо бо роҳбарияти шаҳри Душанбе ва дигар вазорату идораҳои ҷумҳурӣ, нишастҳои тиҷоратию корӣ, намоишгоҳи аксҳо, барномаи фарҳангӣ, доир намудани амалиёти муштараки тиббӣ, табодули таҷрибаи маорифчиён, ҷавонон, сохторҳои сайёҳӣ ва шиносоӣ бо маконҳои сайёҳию таърихии Тоҷикистон дар назар дошта шудааст.

Бояд гуфт, ки Рӯзҳои шаҳри Санкт-Петербург дар Душанбе дар таҳкиму густариши муносибатҳои бародаршаҳрӣ ва ҳамкории гуногунҷанба байни Душанбе ва Санкт-Петербург саҳифаи нав боз намуда,  барои   дарёфти  самту усулҳои тоза ва муайян кардани уфуқҳои нави ҳамкорӣ  заминаи мусоид фароҳам меоранд.

Ёдовар мешавем, ки  байни  шаҳри Санкт-Петербург ва  шаҳри Душанбе соли 1991 паймони бародаршаҳрӣ  баста шудааст.

АКС: Мақомоти  иҷроияи ҳокимияти давлатии шаҳри Душанбе