Дар Агентии амнияти химиявӣ, биологӣ, радиатсионӣ ва ядроӣ озмоишгоҳи муайянкунии молҳои таъиноташон дуҳадафа мавриди истифода қарор дода шуд

ДУШАНБЕ, 25.06.2026 /АМИТ «Ховар»/. Имрӯз дар Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон озмоишгоҳи муосири муайянкунии молҳои таъиноташон дуҳадафа мавриди истифода қарор дода шуд.

Тавре ба АМИТ «Ховар» аз Академияи миллии илмҳо хабар доданд, мақсади асосии фаъолияти озмоишгоҳ аз гузаронидани таҳлилҳои даққиқи лабораторӣ, ташхис, муайянсозӣ ва таснифоти илмию техникии молҳо, маводҳо, таҷҳизот ва технологияҳо иборат мебошад.

Озмоишгоҳ дорои таҷҳизоти замонавӣ ва стандарти ҷаҳонӣ буда, қисми асосии таҷҳизотро хроматографияи моеи баландсифат HPLC ва хроматографияи газӣ-масс-спектрометрӣ GC-MS ташкил медиҳанд. Ин дастгоҳҳо имкон медиҳанд, ки таркиби химиявии маводҳои мураккаб, ҳатто дар консентратсияи хеле паст, бо дақиқии баланд муайян карда шаванд. Озмоишгоҳ махсусан барои таҳлили маводҳои таъиноташон дуҳадафа, пайвастагиҳои органикии заҳрнок ва моддаҳои пешсаф пешбинӣ шудааст.

Зимни ифтитоҳ иттилоъ дода шуд, ки дастгоҳҳо ва методҳои озмоишгоҳ на танҳо дар соҳаи амният, балки дар соҳаҳои гуногуни иқтисод ва илм низ васеъ истифода мешаванд. Аз ҷумла, дар тиб ва фармасевтика барои муайян намудани таркиби доруҳо ва моддаҳои фаъол, дар мониторинги муҳити зист барои таҳлили таркиби ҳаво, об ва хок бо мақсади ошкор кардани ифлоскунандаҳо, дар саноати хӯрокворӣ ва нӯшокиҳо барои назорати сифат ва бехатарии маҳсулот, инчунин дар саноати нафту газ барои таҳлили таркиби маҳсулоти нафтӣ ва газҳои табиӣ истифода бурда мешаванд.

Инчунин озмоишгоҳ минбаъд ба мақомоти давлатӣ ва сохторҳои дахлдор, аз ҷумла Вазорати рушди иқтисод ва савдо, Вазорати саноат ва технологияҳои нав, Хадамоти гумрук, Агентии «Тоҷикстандарт» дар қабули қарорҳои асоснок мусоидат менамояд. Хулосаҳои илмии озмоишгоҳ ҳангоми расмиёти воридот, содирот, транзит, нигоҳдорӣ ва истифодаи молҳои назоратшаванда заминаи боэътимод фароҳам меоранд.

АКС: Академияи миллии илмҳои Тоҷикистон