Шумораи нахустини нашрияи «Набзи омор»-и Коллеҷи омори шаҳри Ваҳдат ба табъ расид

ДУШАНБЕ, 24.06.2026 /АМИТ «Ховар»/. Дар арафаи таҷлили Рӯзи Ваҳдати миллӣ шумораи нахустини нашрияи Муассисаи давлатии таълимии «Коллеҷи омори шаҳри Ваҳдат» бо номи «Набзи омор» аз чоп баромад.

Тавре аз Коллеҷи омори шаҳри Ваҳдат хабар доданд, ҳадафи асосии таъсиси нашрия инъикос ва муаррифии дастовардҳои Ҷумҳурии Тоҷикистон дар даврони соҳибистиқлолӣ, бозтоби фаъолияти гуногунҷанбаи муассисаи таълимӣ, нашри мақолаҳои омӯзгорону донишҷӯён, баланд бардоштани завқи эҷодӣ, таҳкими маърифати касбӣ, рушди ҷаҳонбинии ҷавонон ва огоҳ намудани ҷомеа аз фаъолияти муассиса мебошад.

Таъкид гардид, ки нашрияи «Набзи омор» ҳамчун минбари созандаи андеша, маърифат, дониш ва эҷодиёти омӯзгорону донишҷӯён хизмат хоҳад кард. Тавассути ин минбар донишҷӯён имкон пайдо мекунанд, ки андешаҳои худро баён намуда, мақолаҳои илмӣ-оммавӣ, хабару гузоришҳо, маводи таҳлилӣ ва эҷодии худро нашр намоянд ва маҳорати навиштану таҳқиқоти илмии худро такмил диҳанд.

Ба андешаи масъулин, нашрияи мазкур дар оянда на танҳо бозгӯкунандаи фаъолияти таълимӣ ва тарбиявии коллеҷ, балки равзанаи муаррифии истеъдодҳои ҷавон, ташаббусҳои созанда ва дастовардҳои омӯзгорону донишҷӯён хоҳад шуд.

АКС: Муассисаи давлатии таълимии «Коллеҷи омори шаҳри Ваҳдат»