Дар Душанбе масоили таҳкими низоми миллии амнияти ҳастаӣ баррасӣ гардид

ДУШАНБЕ, 02.07.2026 /АМИТ «Ховар»/. 29 июн дар Душанбе мулоқоти президенти Академияи миллии илмҳои Тоҷикистон Қобилҷон Хушвахтзода бо коршиносони Агентии байналмилалии неруи атомӣ баргузор шуд, ки дар он ҷонибҳо масоили таҳкими низоми миллии амнияти ҳастаиро мавриди баррасӣ қарор доданд.  Дар ин хусус ба АМИТ «Ховар» аз Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон хабар доданд.

Дар мулоқот масъалаҳои баланд бардоштани омодагии сохторҳои дахлдор ҳангоми баргузории чорабиниҳои оммавӣ, рушди ҳамкории техникӣ  ва истифодаи таҷрибаи байналмилалӣ дар самти пешгирӣ, ошкорсозӣ ва вокуниш ба таҳдидҳои радиатсионӣ ва ҳастаӣ баррасӣ шуданд.

Президенти Академияи миллии илмҳои Тоҷикистон  таъкид намуд,  ки таъмини амнияти ҳастаӣ яке аз самтҳои муҳими фаъолияти илмӣ, техникӣ ва танзимгарии ҷумҳурӣ ба ҳисоб рафта, Тоҷикистон ба рушди ҳамкории созанда бо Агентии байналмилалии неруи атомӣ аҳамияти хос медиҳад. Баргузории чунин миссияҳо барои такмили иқтидори миллӣ, таҳкими ҳамоҳангсозии байниидоравӣ ва омодасозии тавсияҳои амалӣ барои ҳифзи аҳолӣ, инфрасохтор ва муҳити зист аҳамияти муҳим дорад.

Коршиносони Агентии байналмилалии неруи атомӣ омодагии худро барои идомаи дастгирии техникӣ, мубодилаи таҷриба ва мусоидат ба рушди иқтидори миллӣ дар самти амнияти ҳастаӣ иброз намуданд. Таъкид гардид, ки чорабиниҳои оммавии сатҳи баланд тақозо менамоянд, ки механизмҳои пешгирикунанда, арзёбии таҳдидҳо, истифодаи таҷҳизоти муосири ошкорсозии радиатсионӣ ва нақшаҳои ҳамоҳангшудаи вокуниш дар сатҳи зарурӣ таҳия ва амалӣ карда шаванд.

АКС: Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон