Олимони тоҷик дар Минск дар Конгресси байналмилалӣ оид ба биология ва экология иштирок доранд

ДУШАНБЕ, 31.07.2026 /АМИТ «Ховар»/. Кормандони Институти ботаника, физиология ва генетикаи растании Академияи миллии илмҳои Тоҷикистон дар Конгресси байналмилалии олимони ҷавон оид ба биология ва экология дар шаҳри Мински Ҷумҳурии Беларус иштирок доранд.

Тавре АМИТ «Ховар» бо истинод ба Академияи миллии илмҳо хабар медиҳад, Конгресси байналмилалӣ 26 июл оғоз гардида, то 31 июл идома меёбад. Муовини директори Институти ботаника, физиология ва генетикаи растанӣ Самариддин Баротов дар бахши пленарӣ дар мавзуи «Маълумоти паспорти генетикии зироати кишоварзӣ (DSI) дар мисоли Тоҷикистон» маърузаи илмӣ намуд. Ин дастоварди олимони тоҷик мавриди муҳокимаи васеи мутахассисони соҳаи генетика қарор гирифта, барои татбиқи ин дастовард дар истеҳсолот тавсияҳои муфид пешниҳод шуданд.

Дар бахшҳои гуногуни конгресс кормандони институт дар мавзуъҳои «Миқдори пигментҳои фотосинтетикӣ дар растании пахта ҳангоми кишти чигитҳои бо хокаи бетонит капсулашуда», «Микробиомаи хок – сарчашмаи муҳими ҳосилхезии хок дар системаи хок – микроорганизм – растанӣ» ва ғайра маърузаи илмӣ намуданд.

АКС: Академияи миллии илмҳои Тоҷикистон