Муассисаҳои таълимӣ ва тандурустии ноҳияи Шаҳринав ба зимистонгузаронӣ омода мебошанд

ШАҲРИНАВ, 06.09.2026 /АМИТ «Ховар»/. Оид ба иҷрои Қарори Ҳукумати Ҷумҳурии Тоҷикистон «Дар бораи сари вақт омода намудани соҳаҳои иқтисодиёту иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2026-2027» дар муассисаҳои таълимӣ ва кӯдакистонҳои ноҳияи Шаҳринав 556,3 тонна ангишт, 397 метри мукааб ҳезум ва 1130 литр сӯзишвории дизелӣ захира гардидааст. Дар ин хусус ба хабарнигори АМИТ «Ховар» аз шуъбаи маорифи ноҳияи Шаҳринав иттилоъ доданд.

Дар муассисаҳои таълимии ноҳия 9 буғхона мавҷуд буда, 766 бухорӣ, 27 генератори барқдиҳанда ва 154 дастгоҳи гармидиҳии барқӣ омода мебошанд.

Муассисаҳои таълимии №1, 3, 15, 42, 45, кӯдакистонҳои рақами 1-2 ва Литсей барои хонандагони болаёқат ба хати барқи озод пайваст мебошанд. Инчунин дар муассисаҳои таълимии ноҳия аз соли 2025 11 тонна ангишт ва 7,5 метри кубӣ ҳезум боқӣ мондааст.

Дар Беморхонаи марказии ноҳияи Шаҳринав ва беморхонаи минтақавӣ, Маркази ташхиси санитарию эпидемиологӣ, Маркази саломатии ноҳиявӣ ва марказҳои саломатии деҳот ва бунгоҳҳои тиббӣ 47,6 тонна ангишт, 27 метри мукааб ҳезум, 640 литр сӯзишвории дизелӣ захира карда шудааст.

Бояд гуфт, ки муассисаҳои соҳаи тандурустии ноҳия бо 89 гармкунаки барқӣ, 41 печкаи аловӣ, 5 генератори барқии коршоям таъмин намудаанд. Беморхонаи марказии ноҳия бо хати озоди барқ таъмин буда, системаҳои болерӣ дар шуъбаҳои беморхона дар ҳолати омодабош қарор доранд.

Масъулини соҳаҳои тандурустию маорифи ноҳияи Шаҳринав иброз доштанд, ки зимистони дарпешистодаро дар сатҳи баланд сипарӣ менамоянд.

АКС: АМИТ «Ховар»