ملاقات وزرای امور خارجه تاجیکستان و افغانستان در دوشنبه

امروز در شهر دوشنبه ملاقات سراج الدین اصل اف، وزیر امور خارجه تاجیکستان با صلاح‌الدین ربانی، وزیر خارجه جمهوری اسلامی افغانستان و همچنین تحت ریاست آنها مشورت های دوجانبه نهاد های سیاست خارجی دو کشور برگزار گردید.

در ملاقات وزرای خارجه و مذاکرات هیئت ها مسائل مربوط به توسعه مناسبات دوجانبه و موضوع های منطقه ای و بین المللی مورد توجه طرفین بررسی شدند و به گسترش همکاری در زمینه های تجارت و اقتصاد، انرژی، حمل و نقل، کشاورزی، صنایع، بهداشت، فرهنگ، علم و آموزش تاکید شد.

تاکید گردید که رشد همکاری مناطق و استان های هم­مرز تاجیکستان و افغانستان عامل مهم تقویت روابط متقابلا سودمند دو کشور می باشد.

در نشست مشترک مطبوعاتی سراج الدین اصل اف گفت: «تاجیکستان از عضویت افغانستان در سازمان همکاری های شانگهای پشتیبانی می‌کند».

وزیر خارجه جمهوری اسلامی افغانستان از سطح روابط دوجانبه تاجیکستان و افغانستان ابراز قناعت مندی کرد و ذکر نمود که افغانستان نگرانی تاجیکستان در مورد امنیت در مرز دو کشور را به خوبی درک می کند.

صلاح‌الدین ربانی افزود:« به اطمنان کامل تاکید می دارم که افغانستان هیج گاه راه نمی دهد که گروه های تروریستی از جانب افغانستان امن و ثبات همسایگان و تاجیکستان را خلل­دار نمایند».

سفر رسمی وزیر خارجه جمهوری اسلامی افغانستان در تاجیکستان ادامه دارد.