ІАМКОРИИ ИННОВАТСИОНИИ ИДМ

Душанбе, 17 ноябр. (АМИТ «Ховар», Покиза Маҳмадбекова). — Агентии федеролии Россия оид ба ИДМ лоиҳаи барномаи байнидавлатии мақсадноки ҳамкории инноватсиониро барои кишварҳои муштаракулманофеъ то соли 2020 омода намуд. Мутобиқи ин санади 300 саҳифагӣ, барнома тақвияти рақобатпазирии иқтисодиёти кишварҳои муштаракулманофеъ ва ташаккули истифодаи самараноки низоми миллии инноватсиониро пешбинӣ менамояд. Дар лоиҳаи барнома вазифаҳои асосии зерин- ташкили фазои байнидавлатие, ки имкониятҳои низоми миллии инноватсиониро муттаҳид намояд, ҳамгироии давлатҳои аъзои ИДМ дар муҳити амиқи илмию техникӣ, инноватсионӣ ва таълимӣ, рушди инфрасохтори фаъолияти инноватсионӣ ва омодакунии кадрҳо ифода ёфтаанд. Ҳаҷми умумии маблағгузории барнома 100-180 миллиард доллар баҳогузорӣ мешавад. Саҳми умумии буҷетҳои миллӣ барои татбиқи он тахминан 5-10 фоизи хароҷоти умумии дохилиро барои тадқиқот ва коркард дар кишварҳои иштирокчӣ дар бар хоҳад гирифт. Дар назар аст, ки барномаи мазкур, дар мулоқоти сарвазирони ИДМ дар шаҳри Санкт-Петербург мавриди баррасӣ қарор гирифта, тасдиқи ниҳоии он дар баҳори соли оянда сурат мегирад.