МУЛОҚОТИ ХУ СЗИНТАО БО РАИСОНИ ПАЛАТАҲОИ ПАРЛУМОНИ ТОҶИКИСТОН

Душанбе, 27 август. (АМИТ «Ховар», Людмила Дубинина). — Раиси Ҷумҳурии Чин Ху Сзинтао бо раиси Маҷлиси миллии ҷумҳурӣ Маҳмадсаид Убайдуллоев ва раиси Маҷлиси намояндагон Сайдулло Хайруллоев мулоқот кард. Зимни сӯҳбат таъкид карда шуд, ки кӯмакҳои техникии Чин ба Тоҷикистон дар бобати амалӣ сохтани барномаҳои сармоягузорӣ дар соҳаҳои нақлиёт, алоқа, сохтмони роҳҳо ва туннелҳо намунаи барҷастаи равнақу ривоҷи муносибатҳои дӯстона, ҳусни ҳамҷаворӣ ва ҳамкории самарабахши ҳар ду кишвар мебошад. Раисони ҳар ду палатаи парлумони Тоҷикистон изҳор карданд, ки мақомоти олии қонунбарори мамлакат барои дар амал татбиқ намудани сиёсати Президенти Ҷумҳурӣ Эмомалӣ Раҳмон бо мақсади таъмини фазои ҳуқуқӣ барои рушди муносибатҳои дуҷониба ва такмили қонунгузории мамлакат тадбирҳо меандешанд. Аъзои парлумони Тоҷикистон дар замина бо Маҷлиси намояндагони халқи саросари Чин ҳамаҷониба ҳамкорӣ карда, таҷрибаи бойи парлумони ин мамлакатро дар соҳаи эҷоди қонунҳо меомӯзанд. Дар ҷараёни сӯҳбат изҳори боварӣ карда шуд, ки парлумонҳои ҳар ду мамлакат аз таҷрибаю имкониятҳои худ барои афзунтар гардондани обрӯю эътибор ва мақоми Созмони ҳамкории Шанхай дар арсаи ҷаҳон самарабахштар истифода мебаранд. Раиси давлати Чин ба мусоҳибонаш барои пазироии самимона изҳори сипос намуда, паёми раиси Кумитаи доимии Маҷлиси намояндагони саросари Чин У Бангоро ба онҳо супорид ва раиси Маҷлиси намоядагон Сайдулло Хайруллоевро даъват кард, ки ба Чин ташриф орад.