ҲУНАРПЕШАГОНИ ТОҶИК ДАР ҶАШНВОРАИ БАЙНАЛХАЛҚӢ ШИРКАТ МЕВАРЗАНД

Душанбе, 24 сентябр. (АМИТ «Ховар», Таҳмина Ғоибназарова). – Дар ҷашнвораи сеюми байналмилалии «Арт Ӯрда», ки аз 23 то 30 октябр дар пойтахти Қирғизистон — шаҳри Бишкек баргузор мегардад, асари саҳнавии Театри давлатии ҷавонони ба номи М.Воҳидов «Рӯзи дарозтар аз аср» намоиш дода мешавад. Ҷашнвораи мазкур солҳои гузашта ба муносибати таҷлили рӯзи таваллуди нависандаи бузурги қирғиз Чингиз Айтматов гузаронида мешуд. Баъди вафоти нависанда, ҷашнвора барои поси хотири ӯ гузаронида мешавад. Шарти асосии ҷашнвора ҳамин аст, ки асарҳои саҳнавии ба он пешниҳодшуда бояд аз эҷодиёти Чингиз Айтматов интихоб карда шаванд. Асари саҳнавии Театри ҷавонони Тоҷикистонро коргардон Султон Усмонов ба саҳна гузоштааст. Асар дар ҷашнвораи мазкур бори аввал намоиш дода мешавад.