ҶАМЪОВАРИИ ПАХТА САР ШУД!

Ноҳияи Ҷаббор Расулов, 4 сентябр. (АМИТ «Ховар», Санавбар Мақсудова). — Дар Ҷамъияти саҳомии «Пахтаи Пролетар» — и ноҳияи Ҷаббор Расулов ба муносибати оғози маъракаи ҷамъоварии пахта ва супурдани он ба марказҳои қабул «Корвони сафед» ташкил карда шуд. Дар маросими ботантана роҳбарони хоҷагиҳо, собиқадорони меҳнат ва пешқадамони истеҳсолот ширкат варзиданд. Ҷамъомадагонро ба ин муносибат муовини аввали сардори раёсати кишоварзӣ Рустам Раҳимов табрик намуд. Раиси ноҳия Насим Обидҷонов зикр кард, ки имсол деҳқонони ноҳия дар масоҳати 8 ҳазору 200 гектар чигит корида, ният доранд, ки ҳосили фаровон ба даст оранд. Тибқи нақша, имсол дар ноҳия 15 ҳазор тонна пахта ҷамъ оварда мешавад. Мухбири АМИТ «Ховар» хабар медиҳад, ки чунин ҷамъомадҳо ба муносибати оғози маъракаи ҷамъоварии пахта дар ноҳияҳои дигари вилоят низ баргузор гардиданд. Деҳқонони вилоят қарор додаанд, ки имсол бештар аз 170 ҳазор тонна пахта ба даст оранд. Вале дар натиҷаи камобӣ дар масоҳати 13 ҳазор гектар ниҳолҳои пахта нарӯид. Ба ақидаи мутахассисон, аз масоҳати боқимондаи 163 ҳазор гектар пахтазор камаш 105 ҳазору 114 тонна пахта ба даст овардан мумкин аст.