ҶАМЪОВАРИИ САБЗАВОТ ДАР ХОҶАГИҲОИ ДЕҲҚОНӢ

Душанбе , 12 сентябр. ( АМИТ «Ховар» , Лаззат Диловарзод).- Тибқи маълумоти фаврӣ аз маркази матбуоти Вазорати кишоварзӣ ба даст омада, то 10 сентябр ҳосили 8 ҳазору 26 гектар сабзавот дар хоҷагиҳои деҳқонӣ ( фермерӣ)- и ҷумҳурӣ ҷамъоварӣ гардидааст. Боиси зикр аст, ки соли ҷорӣ дар масоҳати 13 ҳазору 214 гектар кишти сабзавот гузаронида шудааст. Мувофиқи нақшаи хоҷагиҳо, соли ҷорӣ истеҳсоли сабзавот дар ҷумҳурӣ ба 387 ҳазору 620 тонна расонида мешавад. То 10 сентябри соли ҷорӣ 142 ҳазору 122 тонна сабзавот дар ҳамаи шаклҳои хоҷагидорӣ ҷамъоварӣ шуда, ба аҳолии шаҳру ноҳияҳо пешкаш карда шудааст, ки ин баробари 43,2 фоизи нақшаи муайяншуда мебошад. Ҳосилнокии сабзавот дар ин муддат ба 177 сен/ га расонида шудааст.