ДАР ПОЙТАХТ ҚАЛЛОБЗАН ДАСТГИР КАРДА ШУД

Душанбе, 11 сентябр. (АМИТ «Ховар», Мавҷуда Давлатзода).- Кормандони Шӯъбаи корҳои дохилии якуми ноҳияи Синои пойтахт 10 сентябр сокини кӯчаи Нахимови шаҳри Душанбе Хуршеда Ҳаитоваи 22 — соларо барои қаллобиаш дастгир намуданд. Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, ки номбурда дар Ҷамъияти саҳомии «Мовароунаҳр» сардори шӯъбаи кадрҳо шуда буда, 9 апрели соли ҷорӣ бо роҳи фиреб ба боварии истиқоматкунадаи кӯчаи Карл Маркси шаҳри Панҷакент Гулбаҳор Солеҳоваи 21-сола даромада, барои оғози сохтмони бинои бисёрошёна дар маҳаллаи «Табачка» шартномаи қалбакӣ сохта, ба номбурда ба маблағи 16 ҳазору 600 доллари ИМА зарари моддӣ расонидааст. Акнун ин амали ношоистаи қаллоб тафтиш карда мешавад.