МАСЪУЛИЯТИ ЧИНАКЧИЁН

Душанбе, 19 сентябр. (АМИТ «Ховар», Лаззат Диловарзод).- Ноҳияи Бохтар дуюмин ноҳияи калонтарини пахтакори вилояти Хатлон маҳсуб мешавад. Тибқи дурнамои истеҳсолӣ, соли ҷорӣ дар ноҳияи Бохтар ҷамъоварии 30 ҳазору 150 тонна пахта ба нақша гирифта шудааст. Дар асоси маълумоти фаврии Раёсати растанипарварии Вазорати кишоварзӣ, суръати пахтачинӣ дар ин ноҳия баланд аст. Чинакчиёни хоҷагиҳои пахтакори ноҳия ҳар рӯз то 600 тонна пахта ҷамъоварӣ менамоянд. Дар асоси ба роҳ мондани сиёсати дурусти мақомоти иҷроияи маҳалии ҳокимияти давлатии ин ноҳия ба кори ҷамъоварии пахта 19 ҳазору 200 нафар чинакчиён ва 250 нафар ёрдамчиён сафарбар гардидааст. То 15 сентябр ҳамаи хоҷагиҳои пахтакор бештар аз 8 ҳазору 200 тонна пахта ҷамъоварӣ намуданд. Албатта ин миқдор пахтаи ҷамъоваришуда нисбат ба шумораи аҳолии ба пахтачинӣ сафарбаргардида камтар аст, аммо дар сурати ҳавасманд намудани чинакчиён миқдори ҷамъоварии пахта метавонад боз як маротиба зиёд карда шавад.