МУҲОКИМАИ МАҶМӮИ ТАДБИРҲОИ МУШТАРАКИ ТАЪМИНИ АМНИЯТИ ОЗУҚА

           Душанбе, 13 сентябр. (АМИТ «Ховар», Мавҷуда Давлатзода). — 16 сентябр дар Минск маҷлиси навбатии Шӯрои намояндагони доимии ваколатдори давлатҳои ИДМ баргузор мегардад. Дар маҷлис лоиҳаи рӯзномаи маҷлиси Шӯрои сарони ҳукуматҳои ИДМ баррасӣ карда мешавад, ки 14 ноябр дар Кишинёв баргузор мегардад. Айни ҳол ба рӯзнома 34 масъала дохил карда шудааст.           Сарони ҳукуматҳои мамлакатҳои ИДМ дар Кишинёв маҷмӯи тадбирҳои муштараки таъмини амнияти озуқа, самтҳои асосии вусъат додани хизматрасонии байналхалқии нақлиёти автомобил, беҳтар сохтани фаъолияти мақомоти ҳамкории соҳавӣ, лоиҳаи қарордоду созишномаҳоро дар бораи принсипҳои асосии сиёсати танзиму назорати доду гирифти пул, ҳамкорӣ дар масъалаи системаҳои иттилоотии давлатии шиноснома ва раводид, ҳамкорӣ дар мубориза ба муқобили хариду фурӯши доруҳои калбакӣ, лоиҳаи муоҳидаро дар бораи мақоми қонунии коргарони муҳоҷир, аъзои оилаҳои онҳо муҳокима карда, ҳисоботро дар бораи ҷараёни тасвиб ва амалӣ сохтани ҳуҷҷатҳои дар доираи ИДМ қабулгардида ва масъалаҳои дигарро баррасӣ менамоянд. Тарҷумон — Қудратов А.