МУЛОҚОТИ ВАЗИРИ КИШОВАРЗӢ БО НАМОЯНДАИ СММ

Душанбе, 12 сентябр. (АМИТ «Ховар», Темур Бандишоев).- Вазири кишоварзии ҷумҳурӣ Қосим Қосимов имрӯз бо ҳамоҳангсози Муассисаи зироат ва озуқвории СММ Сукаса Кимото мулоқот кард. Зимни мулоқот масъалаҳои амалӣ сохтани барномаҳои муштарак дар мубориза ба муқобили ҳашароти зараррасон, бо тухмӣ таъмин кардани хоҷагиҳои деҳқонӣ, ҳифзи наботот ва ҳайвонот, беҳтар сохтани фаъолияти соҳаҳои ёрирасони кишоварзӣ ва ғайра муҳокима шуданд. Вазир ба Муассисаи зироат ва озуқавории СММ барои кӯмаку дастгирии Тоҷикистон дар мубориза ба муқобили малах изҳори сипос намуд. С.Кимото зикр кард, ки Муассисаи зироат ва озуқавории СММ айни ҳол дар 75 мамлакат фаъолият дорад. Тоҷикистон дар байни ин мамлакатҳо аз ҷиҳати истифодаи маблағҳои муассисаи мазкур ҷои сиюмро ишғол мекунад. Тавре хабар дода шуда буд, Бонки ҷаҳонӣ чанде пеш ба Тоҷикистон барои хариди гандуми тухмӣ 5 миллион доллар кӯмак расонд. С.Кимото ба вазорати кишоварзӣ барои иштироки фаъолона дар ворид сохтани ғалла ба Тоҷикистон миннатдорӣ баён кард. Вазири кишоварзии Тоҷикистон пешниҳод кард, ки бо мақсади сари вақт ва якҷоя ҳал кардани проблемаҳои кишоварзӣ дар Тоҷикистон намояндагии доимии Муассисаи зироат ва озуқавории СММ кушода шавад. Вазорат барои ин ният дорад, ки таклифҳояшро ба вазорати корҳои хориҷӣ ва Ҳукумати мамлакат пешниҳод кунад.