НАШРИ АШЪОРИ РӮДАКӢ ДАР КИРҒИЗИСТОН

Душанбе, 4 сентябр. (АМИТ «Ховар», Бекназари Абӯбакр). — Нашриёти «Олтин тамға»-и Қирғизистон маҷмӯаи ашъори Абӯабдуллоҳи Рӯдакиро бо номи «Рӯдакӣ – Одамушшуаро» аз чоп баровард. Дар китоб шеърҳои устод Рӯдакӣ ба забонҳои тоҷикӣ, русӣ ва қирғизӣ чоп шудаанд. Шеърҳои Рӯдакиро аз забони тоҷикӣ ба забонҳои русиву қирғизӣ шоирони қирғиз ва рус тарҷума кардаанд. Ҳадафи нашри маҷмӯа ташвиқи ашъори Рӯдакӣ дар Қирғизистон буда, ба тақвияти робитаҳои фарҳангии тоҷикону қирғизҳо мусоидат мекунад. Мураттиб ва масъули нашри китоби «Рӯдакӣ — Одамушшуаро» омӯзгори Донишгоҳи байналмилалии Қирғизистон Шоистаи Равшан мебошад.