СЕМИНАРҲОИ МУФИД

Душанбе, 23 сентябр. (АМИТ «Ховар», Бекназари Абӯбакр). — Бо мақсади дар мӯҳлати муайян ва дар шароити мусоиди агротехникӣ, хушсифат ва сари вақт гузаронидани кишти тирамоҳии зироатҳои ғалладона ва гузоштани заминаи устувор барои ҳосили соли 2009, дар асоси фармони вазири кишоварзии Ҷумҳурии Тоҷикистон ҳафтаи гузашта дар вилояти Суғд ва ноҳияҳои Рашту Ҳисор семинарҳои машваратии ҷумҳуриявӣ дар мавзӯи «Кишти тирамоҳии ғалладона» баргузор гардиданд. Дар семинар олимону мутахассисони соҳаи кишоварзии ҷумҳурӣ иштирок намуданд. Аз маркази матбуот ва иттилооти Вазорати кишоварзӣ ба АМИТ «Ховар» хабар доданд, ки дар семинар мавзӯъҳои «Усулҳои парвариши ғалладонаи тирамоҳӣ», «Тухмии хушсифат — асоси ҳосили фаровони зироатҳои ғалладона» ва «Аз бемориҳо ва ҳашароти зараррасон эмин нигоҳ доштани зироат» муҳокима карда шуданд. Иштирокчиёни семинар тавсия доданд, ки таҷрибаи пешқадами хоҷагиҳои алоҳида дастраси ҳамагон гардонида шаванд. Чунин семинар ҳафтаи оянда дар вилояти Хатлон баргузор мегардад.