ТАҶЛИЛИ РӮЗИ АВИАТОРОН

Душанбе, 4 сентябр. (АМИТ «Ховар», Мавзуна Бойева).- 3 сентябр дар ҷумҳурӣ иди касбии авиаторон таҷлил карда шуд. Ба ин муносибат дар корхонаи воҳиди давлатии «Тоҷик эйр» ҷамъомади ботантана баргузор гардид. Кормандони соҳаро директори генералии корхона Ҳокимшо Тиллоев табрик намуд. Вай зикр кард, ки авиатсия рамзи пешрафти ҳамаҷонибаи илму техника ва тараққиёти иқтисодиёти ҳар гуна давлат ба шумор меравад. Масъулияти ҳалли бисёр масъалаҳои муҳими пешрафти иқтисодиёти Тоҷикистон ба зиммаи кормандони авиатсия гузошта шудааст. Зеро рушди фаъолияти нақлиёти ҳавоӣ масъалаи муҳимтарини сиёсӣ, иҷтимоӣ ва иқтисодӣ мебошад, гуфт Ҳ.Тиллоев. Изҳори боварӣ карда шуд, ки соҳаи авиатсияи Тоҷикистон ба туфайли заҳмати фидокоронаи кормандони соҳа боиси ифтихори мардуми мамлакат хоҳад гашт. Сардори раёсати умумии ҳавонавардии мулкии Вазорати нақлиёт ва алоқаи ҷумҳурӣ Неъматулло Соҳибов дар бораи саҳми калони кормандони соҳа дар пешрафти иқтисодиёти мамлакат сухан ронд. Дар фарҷоми ҷамъомад ба кормандони пешқадам, ветеранҳои ҷанг ва собиқадорони меҳнат тӯҳфаҳои хотиравӣ супорида шуданд.