ТАЪМИНИ НЕРӮИ БАРҚ БОЗ МАҲДУД КАРДА МЕШАВАД

Душанбе, 11 сентябр. (АМИТ «Ховар», Мавзуна Бойева).- Вобаста ба паст шудани маҷрои дарёи Вахш дар рӯзи 11 сентябри соли 2008 воридоти об ба обанбор 556 метри кубӣ.сонияро ташкил медиҳад, ки ин ба 75 фоизи ҳисоби миёнаи моҳона баробар мебошад ва сатҳи обанбор нисбат ба ҳамин давраи соли гузашта ба қадри 8 метр паст аст. Бинобар ин, дар мувофиқа бо Ҳукумати Ҷумҳурии Тоҷикистон, аз 11 сентябри соли ҷорӣ дар сар то сари ҷумҳурӣ интиқоли барқ аз рӯи лимит сурат мегирад. Акнун барои аҳолӣ аз соати 17 -00 то 21-30 ва аз соати 3-30 то 8-00 барқ дода мешавад. Дар соҳаи саноат, барои корхонаҳое, ки қарздор нестанд, дар интиқоли барқ дар доираи маҳдудияти ба минтақаҳо ҷудошуда ҷорӣ карда мешавад. Тавре ба мухбири АМИТ «Ховар» аз маркази матбуоти «Барқ тоҷик» хабар доданд, ки ин тадбир аз рӯи зарурат буда, барои он амалӣ мегардад, ки ҳар сантиметр оби имрӯз сарфашуда дар давраи зимистон душвории мардум ва пешбурди иқтисодиёти моро нисбатан осонтар намояд.