ДАР ҶАМОАТИ ЗАРБДОР БЕПУЛ ДОРУ МЕДИҲАНД

          Душанбе, 8 октябр. (АМИТ "Ховар", Наргис Бойахмедова). Имрӯз дар доираи барномаи ислоҳоти соҳаи тандурустии ҷумҳурӣ дар ҷамоати Зарбдори ноҳияи Кӯлоб Маркази саломатӣ кушода шуд. Директори он Абдукарим Шехов ба мухбири АМИТ «Ховар» гуфт, ки кормандони марказ ба бештар аз 2 ҳазор сокини деҳаҳои ҷамоат хизмати аввалияи тиббӣ мерасонанд. Барои сохтмони бинои маркази саломатӣ 30 ҳазор доллари ИМА ва барои харидани таҷҳизоти зарурӣ аз Ҳиндустон ба Малайзия 6 ҳазор доллари ИМА сарф шуд. Дар ноҳияи Кӯлоб ояндаи наздик боз 9 маркази тиббӣ кушода мешавад. Бояд гуфт, ки дар давраи аввал дар ин марказҳои саломатӣ ба беморон бепул дору дода мешавад. Мухбири АМИТ «Ховар» ёдовар мешавад, ки имрӯз гурӯҳи кормандони воситаҳои ахбори оммавии ҷумҳурӣ дар доираи барномаи Бонки Рушди Осиё дар минтақаи Кӯлоб бо ҷараёни иҷрои барномаю нақшаҳои соҳаи тандурустӣ шинос мешаванд. Ба онҳо намояндаи доимии бонки мазкур дар Тоҷикистон Макото Адзиро роҳбарӣ мекунад.