ФАЪОЛИЯТИ 9 ДЕГХОНАИ ГАРМИДИҲИИ ҶУМҲУРИ БАРҚАРОР МЕГАРДАНД

                 Душанбе, 20 октябр. (АМИТ Ховар», Марзия Саидова).- Аз ҷониби муассисаҳои тобеи Корхонаи воҳиди давлатии «Хоҷагии манзилию коммуналӣ»-и ҷумҳурӣ барқарорсозии 9 адад дегхонаи гармидиҳӣ пешбинӣ шудааст. Назар ба гуфти директори генералии корхонаи мазкур Раҳмат Бобокалонов бо дастгирии Ҳукумати ҷумҳурӣ ва Вазорати молияи кишвар аз ҳисоби маблағҳои Бонки Ҷаҳонӣ барқарорсозии дегхонаҳои аз фаъолият бозмондаи шаҳру ноҳияҳои Хуҷанд, Рӯдакӣ, Ҳисор, Ваҳдат ва хатҳои магистралии бунгоҳи гармидиҳии марказии Ёвон пешбинӣ ва ба нақша гирифта шудааст.                 Ҳамчунин Раҳмат Бобокалонов афзуд, ки дар ин давра дар шаҳри Хуҷанд ду дегхонаи беморхонаҳо аз ҳисоби маблағҳои маҳаллӣ барқарор карда шуданд. Дар шаҳри Қайроқум барқарорсозии як дегхона аз ҳисоби маблағҳои буҷети маҳаллӣ ва дар ноҳияи Ҷалолиддини Румии вилояти Хатлон барқарорсозии ду дегхона аз ҳисоби маблағҳои ташкилотҳои ғайридавлатӣ пешбинӣ шудаанд, ки корҳои барқарорсозӣ дар марҳиллаи анҷомрасӣ мебошанд.