МУСОБИҚОТИ ҚАҲРАМОНИИ ДАСТХОБОНӢ

        Душанбе, 7 октябр. (АМИТ «Ховар», Пайрав Назаров).- Дар шаҳри Алмаатои Қазоқистон мусобиқоти қаҳрамонии мамлакатҳои Осиё дар намуди варзиши дастхобонӣ баргузор гардид. Дастаи мунтахаби Тоҷикистон дар он ширкат варзида, соҳиби 12 медал, аз ҷумла се медали тилло , 4 медали нуқра ва 5 медали биринҷӣ гардид. Варзишгарони тоҷик аз рӯи ҳисоби умумӣ дар ҷадвали мусобиқа ҷои чорумро ишғол намуданд. Мухбири АМИТ «Ховар» хабар медиҳад, ки варзишгари тоҷик Акмал Қодиров дар вазни 90 килограм соҳиби 2 медали тилло гардид. Медали тиллои сеюм насиби варзишгар Ҳусейн Қурбонов шуд. Медалҳои дигарро варзишгарон Фарҳод Комилов, Роман Арсимеков, Далер Беков, Парвина Юлдошева, Нигора Гулматова, Мавзуна Бобоҷонова, Амонбой Умрзоқов ва Нодирхон Дориғӣ ба даст оварданд. Ғолибони ин мусобиқа дар мусобиқоти қаҳрамонии ҷаҳон ширкат меварзанд, ки аз 29 ноябр то 7 декабр дар Канада баргузор мегардад.