ТАБРИКИ ТАРБИЯГИРАНДАГОНИ ХОНАИ БАЧАГОНИ ШАҲРИ ШӮРОБ БА МУНОСИБАТИ ИДИ РАМАЗОН

Исфара, 2 октябр. (АМИТ «Ховар», Санавбар Мақсудова). – Кормандони Агентии миллии иттилоотии Тоҷикистон «Ховар» ба шарафи иди Рамазон ба тарбиягирандагони хонаи бачагони рақами 1 — уми шаҳри Шӯроб ширинӣ, воситаҳои тамизкунанда, асбобу анҷоми хатнависӣ ва бозичаҳо тӯҳфа намуданд. Дар ин ҷо 41 нафар кӯдак парвариш карда мешавад, ки дар давоми як шабонарӯз бо чор вақт хӯроки гарм таъмин мебошанд. Мухбири АМИТ «Ховар» хабар медиҳад, ки барои расондани кӯмак ба хонаи бачагони мазкур аз буҷети маҳаллӣ низ маблағ ҷудо карда мешавад. Хонаи бачагона хати алоҳидаи интиқоли барқ дошта, бо қувваи барқ пурра таъмин карда шудааст. Иҷрокунандаи вазифаи директори хонаи бачагона Ирина Ғаниева зимни сӯҳбат бо мухбири АМИТ «Ховар» гуфт, ки кормандони он дар ҷавоби ғамхориҳои давлату ҳукумат ва созмонҳои гуногун бачагонро дар рӯҳияи меҳнатдӯстӣ, ватанпарварӣ ва инсондӯстӣ тарбия хоҳанд кард. Мо кӯшиш мекунем, ки тарбиягирандагони хонаи бачагон ба камол расида, дар ободии мамлакат саҳми арзанда гузоранд, зикр кард И.Ғаниева.