ҲАЛОКАТИ САРБОЗ

                  Қӯрғонтеппа, 29 ноябр. (АМИТ «Ховар», Мурод Сотиев). — Дар вилояти Хатлон воқеаи нохуш рух дод. Аскари қатории яке аз қисмҳои ҳарбии дар ноҳияи Ҷомӣ ҷойдодашуда Ибодулло Мираков зимни фиристодани аскарон барои муоинаи тиббӣ ба шифохонаи низомии шаҳри Душанбе худро аз мошин партофт. Вай дар натиҷа сахт маҷрӯҳ гашта, ба шифохона фиристода шуд. И. Мираков баъдан дар шифохона вафот кард.                  Корманди прокуратураи гарнизони Қӯрғонтеппа Шӯҳрат Бадалов ба АМИТ «Ховар» хабад дод, ки ин воқеа тафтиш карда мешавад. И. Мираков 22 октябр аз ноҳияи Бохтар ба хизмати ҳарбӣ даъват шудааст ва маълумоти олӣ дорад. Ш. Бадалов зикр кард, ки ин воқеа ба муносибатҳои байни хизматчиёни ҳарбӣ ва зуҳуроти зӯроварӣ вобаста нест. Сабабҳои он дар натиҷаи тафтиш муайян карда мешаванд.