ҶСК «АГРОИНВЕСТБОНК» БО ҶОИЗАИ «БЕҲТАРИН БОНК — ШАРИК» МУКОФОТОНИДА ШУД

          Душанбе, 5 ноябр. (АМИТ «Ховар», Покиза Маҳмадбекова). – Чанде қабл бо ибтикори Ассотсиатсияи ташкилотҳои маблағгузории хурди Тоҷикистон, Ҷамъияти Олмонӣ оид ба ҳамкории техникӣ ва бо дастгирии Бонки миллии Тоҷикистон, ҶСК «Агроинвестбонк», Хазинаи Сорос, USAID ICCO  ва CAMFA дар Душанбе Форуми маблағгузории хурди инвеститсионӣ — ҳуқуқии «Сармоягузории масъулиятнок ва мувофиқи ҳуқуқӣ» баргузор гардид.  Дар ҷамъомади мазкур намояндагон аз Дастгоҳи иҷроияи Президенти кишвар, Бонки  миллии Тоҷикистон, бонкҳои дигари ҷумҳурӣ, ташкилотҳои молиявии хурд, сармоягузорон, намояндагони ширкатҳои молиявии хориҷӣ иштирок доштанд. Дар кори он  масоили вобаста ба дурнамои Ҳукумати Ҷумҳурии Тоҷикистон доир ба беҳтар намудани иқлими инвеститсионӣ ва такмил додани муҳити ҳуқуқӣ дар маблағгузории хурд, нақши Бонки миллии Тоҷикистон дар бозтамвили бахш, имкониятҳо, шароитҳо ва талабот, таҷрибаи байналхалқии механизмҳои самараноки танзими сармоягузории хурд, такмил додани танзими меъёрӣ — ҳуқуқии бахш дар ҷумҳурӣ, натиҷаҳои бадастомада ва талаботҳои мавҷуда мавриди баррасӣ қарор гирифт. Бори нахуст Форуми маблағгузории хурди инвеститсионӣ — ҳуқуқӣ барои ғолибони озмуни «Беҳтарин Сармоягузор», «Беҳтарин Бонк — Шарик», «Беҳтарин Коршиноси Қарзӣ» ва «Беҳтарин Роҳбари ташкилоти хурди молиявӣ» чор ҷоиза пешниҳод намуд.         ҶСК «Агроинвестбонк»  дар ҷумҳурӣ аввалин бонкест, ки барои омодагӣ ба ҳамкории асоснок ва дастгирии ташаббусҳои бахш, саҳмгирӣ ва таъсиси аввалин институти миллӣ — Ташкилоти Хурди Депозитии «Боварӣ ва Ҳамкорӣ» ва саҳмгузорӣ дар рушди Ассотсиатсияҳои ташкилотҳои маблағгузории хурди Тоҷикистон бо ҷоизаи «Беҳтарин Бонк — Шарик» мукофотонида шуд. Ҷоизаи мазкурро ба намояндаи  ҶСК «Агроинвестбонк» роҳбари лоиҳаи Ҷамъияти Олмонӣ оид ба ҳамкории техникӣ Бернд Беннинг супурд.