АЛИСОВ МУҲОҶИРОНИ КОРИИ ТОҶИКРО БА САМАРА МЕБАРАД

Душанбе, 10 ноябр. (НИАТ «Ховар», Марзия Саидова).- Гурӯҳи корӣ таҳти роҳбарии сардори маркази иттиҳоди ҷамъиятӣ-машваратии назди Раёсати Хадамоти муҳоҷирати Федералии шаҳри Самараи минтақаи Поволжскийи Русия Н. Алисов рӯзҳои наздик ба Душанбе меояд.             Дар назар аст, ки гурӯҳи корӣ бо роҳбарият ва масъулини Хадамоти муҳоҷирати Вазорати корҳои дохилии Ҷумҳурии Тоҷикистон дидору мулоқот намуда, масъалаҳои тақвияти ҳамкориро бо сохтори марбутаи ҷумҳурӣ мавриди баррасӣ қарор медиҳанд. Тибқи иттилои нозири калони гурӯҳи матбуоти Хадамоти муҳоҷирати ВКД Раҷаббек Илёсов,  дар ҷараёни мулоқот масъулини сохторҳои зикргашта масъалаҳои барои муҳоҷирони кории тоҷик омода намудани  шароити мусоиди кору зист, ҳимояи ҳуқуқу манфиатҳои онҳо, пешгирии муҳоҷирати ғайриқонунӣ, инчунин ифтитоҳи маркази қабул барои ҷобаҷокунӣ, гирифтани иҷозатнома  барои кор ва додани иттилои лозимӣ дар минтақаи Поволжскийро муҳокима намуда, қарорҳои дахлдор қабул хоҳанд кард.