АМАЛИ СЕ ИҶОЗАТНОМАИ «ТК МОБАЙЛ» ҚАТЪ КАРДА ШУД

        Душанбе, 27 ноябр. (АМИТ «Ховар», Покиза Маҳмадбекова). — Комиссияи иҷозатномадиҳии Хадамоти давлатии назорат ва танзим дар соҳаи алоқа ва иттилоотонӣ амали се иҷозатномаи ҶСП «ТК Мобайл» — ро ба мӯҳлати се моҳ боз дошт.        Тавре ба АМИТ «Ховар» аз Хадамоти мазкур иброз доштанд, ин қарор дар асоси моддаи 6 Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият», Низомнома «Дар бораи хусусиятҳои иҷозатномадиҳӣ ба баъзе намудҳои фаъолият» 26 – уми ноябри соли 2008 то 3 – юми феврали соли 2009 боз дошта шуд.        Ширкати «ТК Мобайл» вазифадор карда шуд, ки то мӯҳлати нишондодашуда камбудиҳои ҷойдоштаро доир ба фаъолияти иҷозатномаҳои зикргардида бартараф намуда, аз натиҷааш ба Хадамоти давлатии назорат ва танзим дар соҳаи алоқа ва иттилоотонӣ ахборот ирсол намояд. Қарори мазкур дар ҳузури намояндаи «ТК Мобайл» хононда шуд. Нусхаи қарори мазкур ба Прокуратураи Генералии Ҷумҳурии Тоҷикистон, Вазорати нақлиёт ва коммуникатсияи Ҷумҳурии Тоҷикистон ва мақомоти андоз фиристода шуд.