БАРОИ БОҒДОРОНИ БАДАХШОН ҲОЛО ҲАМ ФОИДАИ НОЧИЗ МЕМОНАД

                Душанбе, 29 ноябр. (АМИТ «Ховар», Покиза Маҳмадбекова). — Бадахшон макони беҳтарини парвариши зардолу ва чормағз аст. Дар ин ноҳияҳо қариб 40 навъи зардору парвариш меёбад, ки беҳтарин навъи онҳо сафедак, дарагӣ, равшаналӣ, мамаднурӣ, гулаи балх, маъмурӣ ва исфарагӣ мебошанд. Дар таркиби меваи зардолуи Бадахшон қанд ва оҳан нисбати зардолуи манотиқи дигар зиёд аст.                Солҳои охир майдони боғҳои зардолу хеле зиёд гардид, вале барои вилоят ва боғдорон то ҳоло ҳам фоидаи ночиз мемонад. Зеро ҳосили ин боғҳо коркард нашуда, дар бозорҳои маҳаллӣ танҳо як қисмати ками он дар мавсими пухтани мева ба фурӯш бароварда мешавад. Қисми зиёди ҳосил бо сабаби истифода накардани технологияи хушккунии он дар дохили боғҳо мепӯсад, ё дар рӯи сангу бом аз ҳарорати офтоб сӯхта, сифаташро пурра аз даст медиҳад.              Бисёр хуб мешуд, агар нисбати ин масъала Ҳукумати ҷумҳурӣ чораҳои зарурӣ меандешиду дар худи вилоят корхонаи коркарди ин намуди меваҳо ба роҳ монда мешуд.