БОДИ БӮҲРОНИ ИҚТИСОДӢ СӮИ ТОҶИКИСТОН МЕВАЗАД

               Душанбе, 14 ноябр. (АМИТ «Ховар», Лаззат Диловарзод).- Дар Вазорати меҳнат ва ҳифзи иҷтимоии аҳолии Тоҷикистон ба мухбири АМИТ «Ховар» иттилоъ доданд, ки бо сабаби шиддат гирифтани бӯҳрони иқтисодии ҷаҳонӣ ва кам шудани талабот ба қувваи корӣ, теъдоди муҳоҷирони меҳнатӣ нисбат ба соли 2007 коҳиш ёфт.               Аз рӯи бозгашти садҳо нафар шаҳрванди Тоҷикистон аз Федератсияи Русия ва дигар ҷумҳуриҳои Иттиҳоди Давлатҳои Мустақил маълум мегардад, ки дар ин кишварҳо ҳам эҳтиёҷ ба қувваи корӣ кам шуда, сафи муҳоҷирони меҳнатии бекор зиёд мегардад.               Лозим ба ёдоварист, ки танҳо соли 2007 тавассути бонкҳо ба Ҷумҳурии Тоҷикистон бештар аз 1,5 миллиард доллари амрикоӣ интиқол дода шудааст.               Дар се моҳи охир тавассути бонкҳо ба ҷумҳурӣ нисбат ба моҳҳои август- октябри соли 2007 50 млн. доллар кам маблағ ворид шудааст.