БУНЁДИ МАДАД БА МУТАХАССИСОНИ ҶАВОН МАДАД МЕРАСОНАД

            Душанбе, 17 ноябр. (АМИТ «Ховар», Лутфия Эшонқулова) — Аз 17 то 23-юми ноябр дар пойтахти шаҳри Қирғизистон — Бишкек давраи тирамоҳии «Мактаби худидоракунии маҳаллӣ» барои донишҷӯён ва мутахассисони ҷавони Тоҷикистону Қирғизистон оғоз мегардад. Чорабинии мазкур бо дастгирии Институти ҷомеаи кушода- Бунёди мадади Тоҷикистон, дар якҷоягӣ бо «Маркази технологияҳои ҷамъиятӣ» доир гардида, марҳилаи навбатии татбиқи лоиҳаи «Мактаби тадқиқоти шаҳрдорӣ ва технологияҳо» ба ҳисоб меравад.                 Татбиқи лоиҳа моҳи январи соли  ҷорӣ оғоз гардида,  дар доираи озмун 12 донишҷӯ ва мутахассиси ҷавон аз тамоми гӯшаву канори ҷумҳурӣ  оид ба ҷанбаҳои мухталифи худидоракунии маҳаллӣ пажӯҳишҳои таҳлилӣ анҷом доданд. Мақсади лоиҳа — эҷоди замина барои такмили сифати омодагии технологии мутахассисон дар риштаи менеҷмент барои мақомоти идора ва худидоракунии маҳаллӣ ва анҷоми корҳои таҳлилӣ мебошад.