ДАР БАЛҶУВОН ЁДГОРИҲОИ ТАЪРИХИРО АЗ МАРДУМ МЕХАРАНД

        Балҷувон, 24 ноябр. (АМИТ «Ховар», Сулаймон Холов).- Минтақаи туризми байналхалқӣ эълон гардидани ноҳияи Балҷувон ба вусъат ёфтани корҳои таъмиру барқарорсозӣ замина гузошт. Дар маркази ноҳия сохтмони муассисаҳои маорифу фарҳанг, меҳмонхонаю ошхона ва биноҳои маъмурӣ босуръат идома дорад.      Мақомоти иҷроияи маҳаллии ҳокимияти давлатии ноҳия барои обод намудани мавзеъҳои таърихӣ ва муассисаҳои фарҳангӣ таваҷҷӯҳи хоса зоҳир карда истодааст. Осорхонаи ноҳиявӣ бо маблағгузории ҳокимияти маҳаллӣ аз нав таъмир гардида, барои дастрас намудани ёдгориҳои таърихӣ аз сокинон ва дигар осорхонаҳои кишвар маблағи муайян ҷудо карда шудааст. Айни замон бо маслиҳати мутахассисон дар осорхона ёдгориҳои таърихӣ аз рӯи пайдоишашон ҷо ба ҷо гузошта шудаанд, ки аз таърихи бою рангини ин мавзеъ дарак медиҳанд.       Хонаи фарҳанги ноҳия низ аз таъмир баромада, дар он як қатор барномаҳои фарҳангӣ гузаронида шуд. Бо муҳайё гардидани шароити мусоид, театрҳои ҷумҳурӣ бо барнома ва намоишномаҳои хеш ба ноҳияи Балҷувон сафар карда истодаанд.