ДАР КӮЛОБ КОРХОНАҲО АЗ НАВ БА КОР ШУРӮЪ МЕКУНАНД

               Кӯлоб, 22 ноябр. (АМИТ «Ховар», Сулаймон Холов).- Чанд сол муқаддам бо сабаби дарки нодурусти моҳияти хусусигардонии амволи давлатӣ ва аз истеҳсолот дур шудани мутахассисони соҳа, дар шаҳри Кӯлоб аксар корхонаҳои калони саноатӣ аз фаъолият боз монданд. Барои таъмини пешрафти соҳа ва ба шуғли доимӣ фаро гирифтани сокинони шаҳр, бо дастгирии Ҳукумати Ҷумҳурии Тоҷикистон, Мақомоти иҷроияи маҳаллии ҳокимияти давлатии шаҳри Кӯлоб ва соҳибкорони маҳаллӣ корхонаҳо аз нав ба кор шурӯъ намуданд.              Давоми ду моҳ аст, ки саноатчиёни шаҳр барои табодули таҷриба дар корхонаҳои саноатӣ семинар-машваратҳои омӯзишӣ доир менамоянд. Чунин як семинар дар корхонаи ресандагии «Кӯлоб-Текстайлз» баргузор гардид. Роҳбарияти шаҳр дар семинар таъкид дошт, ки бояд ба масъалаи истеҳсоли маҳсулот ва таъмини ҷойҳои нави корӣ эътибори ҷиддӣ дода шавад.              Бояд зикр намуд, ки корхонаи ресандагии «Кӯлоб-Текстайлз» соли 2001-ум ба фаъолият шурӯъ намуда, бо истифода аз ашёи хоми маҳаллӣ дар як рӯз 4 тонна риштаи аълосифат истеҳсол менамояд, ки ин маҳсулот ба хориҷи мамлакат содир карда мешавад.              Масъулин қайд карданд, ки айни замон дар корхона 130 нафар мутахассис дар се баст ба кор фаро гирифта шудаанд.