ДАР ОЗАРБОЙҶОН МАСОИЛИ САРКАШӢ АЗ ПАРДОХТИ АНДОЗ МУҲОКИМА ШУД

             Душанбе, 27  ноябр. (АМИТ «Ховар»,  Мавҷуда  Давлатзода). – Дар  пойтахти Ҷумҳурии  Озарбойҷон  —  шаҳри  Боку  маҷлиси  15 –уми  шӯрои  ҳамоҳангсози  роҳбарони  муассисаҳои андози  давлатҳои  ИДМ  баргузор  гардид. Дар  он  намояндагони  Озарбойҷон,  Белорусия, Қазоқистон,  Молдавия,  Россия,  Тоҷикистон, Украина ва  Хадамоти   даромадҳои  давлатии  Латвияю  Эстония   иштирок  намуданд. Дар  маҷлис   намояндагони  Арманистон  ва  Қирғизистон  ширкат  наварзиданд.  Аъзои  Шӯро  маърӯзаи   раиси  Шӯрои  ҳамоҳангсози  роҳбарони  муассисаҳои  андози  давлатҳои  ИДМ – ро  «Дар  бораи  истифодаи   созишномаҳои  сарфи  назар  кардани  андозбандии  дубора  ва  пешгирии   саркашӣ аз пардохти   андоз  дар  давлатҳои ИДМ»  муҳокима  намуданд. Баъдан  дар  маҷлис  масъалаҳои  омӯзиши  тағйироти  қонунҳои  андози  давлатҳои  ИДМ,  мубодилаи  маълумот,  иваз  кардани таҷриба  дар  соҳаи ҷамъоварии андоз  баррасӣ  намуда,  самтҳои  асосии  фаъолияти  шӯро  дар  соли оянда   мувофиқа  карда шуданд. Маҷлиси  навбати Шӯрои  мазкур   нимаи  аввали  соли  оянда  дар  Федератсияи  Россия  баргузор  мегардад.