ДУХТУР АЗ ДАЪВАТШАВАНДАҲОИ ҲАРБӢ 600 ДОЛЛАР ПОРА ГИРИФТ

             Душанбе, 12 ноябр. (АМИТ «Ховар», Мавҷуда Давлатзода).- Кормандони Раёсати амнияти дохилии Вазорати корҳои дохилии Ҷумҳурии Тоҷикистон дар беморхонаи марказии ноҳияи Бобоҷон Ғафурови вилояти Суғд бо гумони гирифтани пора духтури беморхонаи мазкур, истиқоматкунандаи шаҳри Хуҷанд Абдулвосит Тағоеви 37-соларо дастгир намуданд.             Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» иттилоъ доданд, ки А. Тағоев дар баробари духтури беморхонаи марказии ноҳияи Б. Ғафуров будан, Раиси комиссияи тиббии даъвати ҳарбии ноҳияи мазкур мебошад.              Маълум гардид, ки А. Тағоев аз шаҳрвандон Комил Баротов ва Мавлон Умаров бемор бароварда, аз онҳо 600 доллари ИМА пора гирифтааст.             Айни ҳол нисбати ӯ парвандаи ҷиноӣ боз гардида, мавсуф дар маҳкамаи муваққатӣ нигоҳ дошта шудааст.