ИМСОЛ ҲАМ ДУРНАМОИ ИСТЕҲСОЛИ ПАХТА ЗЕРИ СУОЛ ҚАРОР ДОРАД

               Душанбе, 12 октябр. (АМИТ «Ховар», Лаззат Диловарзод).- Бино ба маълумоти фаврии Раёсати растанипарварии Вазорати кишоварзӣ, дар давоми як ҳафтаи охир ҷамъоварии пахта дар ҷумҳурӣ рӯзе аз 0,1 фоиз боло нарафт.              То 10- уми ноябр хоҷагиҳои пахтакори ҷумҳурӣ ба миқдори 351 ҳазор тонна пахта ҷамъоварӣ намудаанд, ки ин ба 63,9 фоизи дурнамои истеҳсолӣ баробар аст.              Ҷамъоварии ҳаррӯзаи пахта дар моҳи ноябр якбора ба 0,1 фоиз расид, ки ин нисбат ба охири моҳи октябр ба андозаи 0,9-1 фоиз камтар мебошад.               Суръати пахтачинӣ дар пешқадамтарин ноҳияҳои пахтакор- Кӯлобу Шаҳритус ҳам хеле суст шуд. Ин аст, ки дар сурати ҷамъоварии ҳаррӯзаи 0,1 — 0,2 фоизи пахта, иҷрои дурнамои истеҳсоли пахта дар соли равон дар ин ду ноҳияи пешсафи ҷумҳурӣ зери суол қарор мегирад.              Дар ноҳияи Шаҳритус аз 19 хоҷагии пахтакор танҳо ду хоҷагӣ- хоҷагии деҳқонии Сайёд ва хоҷагии деҳқонии Пахтаобод мутаносибан ба андозаи -164- 188,2 фоиз дурнамои истеҳсоли пахтаро иҷро кардаанду халос. Дигар хоҷагиҳои пахтакори ин ноҳия ҳатто 70 фоизи иҷрои нақшаи истеҳсолӣ нарасидаанд.              Дар ноҳияи Кӯлоб вазъи ҷамъоварии пахта беҳтар бошад ҳам, бо чунин суръат 100 фоиз иҷро кардани нақша ба гумон аст.