ИСЛОМ БА ТАФРИҚААНДОЗӢ ВА ДИГАР ЗУҲУРОТИ НОМАТЛУБ НАФРАТ ДОРАД

                                                                                                               Душанбе. 7 ноябр. (АМИТ «Ховар», Марзия Саидова).- Гурӯҳи ходимони динии  Тоҷикистон таҳти роҳбарии раиси Шӯрои уламои Ҷумҳурии Тоҷикистон Амонулло Неъматзода аз 8-умин конфронси мусулмонони ҷаҳон баргаштанд.          Конфронси мазкур таҳти унвони «Ислом дар роҳи сулҳ, садоқат ва ваҳдат» дар пойтахти Ҷамоҳири Арабии Либия- шаҳри Триполи баргузор гардид. Дар ин нишаст 500 нафар ходими дин аз 63 кишвари ҷаҳон иштирок карданд. Яке аз иштирокдорони нишаст раиси Шӯрои уламои вилояти Суғд  Ҳоҷиҳусайн Мӯсозода зимни сӯҳбат ба хабарнигори АМИТ «Ховар» гуфт, ки иштирокдорони конфронси 8-уми мусулмонони дунё масъалаҳои муҳими марбут ба ҷаҳони ислом ва мусулмононро баррасӣ намуданд. Зикр шуд, ки ислом дар ҷаҳони имрӯза танҳо сулҳу дӯстӣ, бародарию ҳамрайъӣ ва садоқату ваҳдатро парастиш намуда, ба терроризм, тафриқаандозӣ  ва дигар зуҳуроти номатлуб, ки имрӯз бархе аз гурӯҳҳо онро ба дини мубини ислом нисбат медиҳанд,  нафрат дорад.