КАЗЗОФӢ: «МУСУЛМОНОНИ ИДМ, ДАР ҲИФЗИ ИСЛОМ УСТУВОР БОШЕД!»

Душанбе, 10 ноябр.(АМИТ «Ховар», Марзия Саидова).-Ба 60 нафар ходими динии Тоҷикистон имкон даст дод, ки аз мулоқоти судманди  роҳбари муаззами инқилоби Либия- Муаммар Ал-Казоффӣ баҳравар гарданд. Роҳбари инқилоби Ҷамоҳири  Арабии Либия Муаммар Ал- Казоффӣ бо даъвати муфтии Федератсияи Русия Равил Гайнутддин ба ин  давлат омада, дар толори меҳмонхонаи «Hotel President» (Ҳотел Президент)- и Маскав бо ходимони динии кишварҳои Иттиҳоди Давлатҳои Мустақил дидору мулоқот намуд. Тибқи иттилои ноиби раиси Шӯрои уламои Ҷумҳурии Тоҷикистон Ҳоҷиҳусайн Мӯсозода, ки дар вохӯрӣ иштирок дошт,   Муаммар Ал-Казоффӣ зимни суханронияш доир ба нақши ислом ва мавқеи мусулмонони ҷаҳон дар шароити глобализатсияи ҷаҳони муосир  ибрози назар кард. Ӯ  гуфт, ки дини мубини ислом дар ҷаҳони кунунӣ нисбати дигар динҳо эҳтирому самимияти бузург  дошта, ба  инсонҳо рӯҳияи дӯстиву рафоқат,  ҳамбастагӣ ва худшиносиро талқин менамояд. М. Каззофӣ аз  мусулмонони ИДМ даъват ба амал овард, ки дар ҳифзи арзишҳои олии дини мубини ислом устувор бошанд, то нагузоранд гурӯҳе ё халқе  ба дини ислом ва паёмбарони он иснод орад.